Walay direktang epekto sa impeachment trial ni Bise Presidente Sara Duterte ang nahitabong shooting incident nga miresulta sa lockdown sa Senado. Mao kini ang pagtan-aw ni Atty. Allan Panolong, national president sa Integrated Bar of the Philippines.
Sa interbyu sa Bombo Radyo, gipadayag ni Panolong nga sa iyang legal nga panan-aw ug obserbasyon, usa lamang kini ka isolated nga insidente ug unang higayon nga nahitabo sulod sa maong institusyon.
Matod niya, nagtuo siyang makahimo ang Senate leadership og dugang nga mga lakang aron mapalig-on ang seguridad sa umaabot nga mga kalihokan sulod sa Senado.
Gidugang pa sa abogado nga dili lamang ang Senate Sergeant-at-Arms ang kinahanglan molihok, kondili kinahanglan usab ang kooperasyon sa mga law enforcement agencies sama sa PNP, NBI ug Armed Forces of the Philippines.
Gipasabot usab niya nga importante ang mas hugot nga seguridad ilabi na sa panahon sa sensitibong mga proseso sama sa impeachment trial aron mapanalipdan ang mga senador, prosecutors ug uban pang maapil sa proceedings.
Para ni Panolong, kinahanglan masiguro ang kaluwasan sa tanan, ilabi na nga adunay nagkalain-laing grupo sa mga supporters ang matag opisyal nga mahimong makaapekto sa kahimtang sa seguridad sa mahitabong trial.
