CAGAYAN DE ORO CITY – Pagka-diskuwalipikar ug pag-atubang sa kasong kriminal ang hayan atubangon sa bisan kinsa nga mga kandidato nga madutlan sa resolution sa Commission on Elections o Comelec nga nagdili sa mga diskriminasyon ngadto sa mga sector sa katilingban.
Kini ang katin-awan ni Misamis Oriental Provincial Election Supervisor Atty. Carlito Ravelo kabahin sa gilugwa nga show cause order sa Comelec Task Force SAFE ngadto kang Provincial Gov. Peter Unabia.
Kini nunot sa iyang giatubang nga mga kontrobersyal nga mga pahayag sa isyu sa mga igsoong Muslim ug sa paghatag scholar grants ngadto sa mga babaye nga gusto mokuha sa kursong nursing sa lalawigan.
Miingon si Ravelo nga hatagan pa sa igong panahon ang gobernador aron modason sa iyang katin-awan kabahin sa mga kontrobersyal niini nga mga pahayag sa miaging political campaign rally sa Villanueva niadtong Abril 3 ning tuiga.
Una usab niini,makapila nang nangayo’g pasaylo si Unabia sa mga hingtungdang sector kung kini ang paagi aron masabtan ang iyang punto ug makahupay sa ilang gibati nga kadismaya.
Gani,nakig-atubang ang gobernador sa Muslim community leaders aron subli ipalanog ang iyang punto isip tubag sa gihimong inter-faith dialogue sa simbahang Katoliko nga gipahigayon sa bishop’s house sa Cagayan de Oro Archdiocese sa Cagayan de Oro kagahapon sa buntag.
