CAGAYAN DE ORO CITY – Gidili ang magkalo, gidili ang pagpanigarilyo, pagdala ug packed bag, pag-reyban o itom nga shades kung mulantaw sa Civic and Military parade sa nagsingabot nga adlaw sa piyesta sa pangilin ni Sr. San Agustin, ning syudad.
Sumala ni Cagayan de Oro City Police Office (COCPO) Director Sr/Supt Robert Roy Bahian, ilang gi-diskorahe ang mga ginikanan nga dad-on ang mga batang gagmay sa mga aktibidad nga dagsaan sa lapad nga ihap sa mga katawhan.
Gidili usab ang pagbibit sa mga mahait nga hinagiban.
Gi-awhag sa mga otoridad ang mga personahe nga duolan sa mga mag-roving nga sakop sa COCPO nga isumitar ang kaugalingon alang sa personal ng identipikasyon.
Kini wala nagpasabot nga gisita ug pagadakpon ang usa ka tawo apan kabahin lamang sa standard operating procedures o SOP nga ipatuman sa mga otoridad batok sa mga dautang elemento nga posibleng musawsaw sa bagang doot sa mga katawhan nga musaksi sa mga big events nga naglangkob sa city fiesta activities.
Dugtong niini, gidili na nga makapamaligya ang street vendors sa mga dalan nga agi-an sa civic and military parade.
