CAGAYAN DE ORO CITY-Dili pa makompirmar ni Cagayan de Oro City Police Office o COCPO spokesperson Police Supt. Mardi Hortillosa kon mawala ang signal sa celphone sa traslacion sa Itom nga Nazareno sa syudad sa Enero 9 ning tuiga.
Siya miingon nga padayon pa nilang gisabutan kon mahinayon kini ilabina nga bisan si City Mayor Oscar Moreno ang nagduha-duha sa pagpatuman niini.
Nanawagan na lamang si Hortillosa nga kon unsa man ang hukom sa kapolisan,suportahan kini sa publiko.
Una nang gibutyag ni Hortillosa nga all set na ang seguridad sa dakbayan sa maong kalihukan.
Samtang gihangyo sa mga ijo ug ija ang publiko ilabina ang kababayen-an nga moapil sa prusisyon nga dili magpa-sexy sa ilang mga sul-ubon mismo sa traslacion sa Itom nga Nazareno sa syudad sunod semana.
Gihimo ni Toto Salcedo,head sa Traslacion sa Itom nga Nazareno ang pasidaan tungod sa nabantayan sa naglabay’ng mga tuig diin walay pagpakabana ang pipila ka deboto.
Gani, gibutyag usab niini nga gidili ang mga back pack, mga mahait nga hinagiban ug ilimnong makahubog nga bitbiton atol sa prusisyon.
Hisayran nga anaa sa 300-mil ka deboto sa nagkadaiyang bahin sa Mindanao ug Visayas ang gilauman nga modagsa sa dakbayan sa selebrasyon sunod semana.
