CAGAYAN DE ORO CITY – Sugdan na’g patuman sa National Telecommunication Commission 10 ang signal jamming o temporaryong pagputol sa linya sa komunikasyon alang sa nabiling dagkong kalihukan sa nagkaduol nga kapistahan ni Sr San Agustin sa dakbayan.
Kini human kompirmaha ni CDRRMD manager Nick Jabagat nga aprobado na ang hangyo sa security sector nga putlan sa linya sa komunikasyon ang street dancing competition nga himoon unya ala una sa hapon padulong sa alas 7 sa kagabii.
Siya miingon nga apil sa wad-a’g signal ang mga lokasyon nga agian sa 150 ka contigents sa civic,military and flute parade nga gustong pasugda’g sayo ni City Mayor Rolando ‘Klarex’ Uy ugma sa buntag.
Gipasiguro usab sa mayor nga walay pagkabalda sa relihiyosong kalihukan sa prosesyon ug fluvial parade sa mismong adlaw sa kapistahan sa patron San Agustin sa Agosto 28.
