CAGAYAN DE ORO CITY – Gibarugan ni City Mayor Oscar Moreno nga wala siya’y plano nga ipaubos sa lockdown ang tibook dakbayan sa Cagayan de Oro.
Kini taliwala sa panawagan sa ubay-ubay ka mga residente sa syudad nga angayang ipaubos sa lockdown ang dakbayan aron makalikay sa bahad sa coronavirus disease 2019 o COVID-19.
Si Moreno miingon nga ang pagpuyo sulod sa panimalay maoy epektibo nga pamaagi aron malikayan ang pagkaylap sa virus.
Gani, gipangayo niini ang suporta ug kooperasyon sa katawhan sa iyang panawagan ilabina nga dili siya gusto nga maapektohan ang ekonomiya sa syudad pinaagi sa deklarasyon nga lockdown.
Samtang gimanduan ni Moreno ang kapolisan nga dakpon ang bisan kinsa nga mohimo’g diskriminasyon sa mga tawo nga mipaubos sa home quarantine.
Siya miingon nga dili mahimo nga did-an ang usa ka tawo nga mopuyo sa usa ka lugar.
Gihimo sa alkalde ang kamanduan dihang nakadawat siya’g report nga ang mga estudyante nga nakabalik dinhi gikan sa usa ka kalihokan sa Manila ang gipalayas sa ilang mga panimalay ug temporaryong gikwarantina sa mga tunghaan.
Gitin-aw nini nga dili mga person under investigations ang mga estudyante ug ila lamang gisunod ang protocol nga ipaubos sila sa kwarantina gumikan kay naggikan sila sa kauluhan.
