CAGAYAN DE ORO CITY-Gipaagi sa supporters ug kaalyado sa gipatay’ng Punong Barangay sa Danao, Jasaan Misamis Oriental sa ‘silent protest’ ang ilang pagpangayo’g hustisya sa kamatayon ni Alfredo Zapanta.
Kini human nagtoo sila nga pulitika ang motibo sa paghun-os sa kinabuhi sa biktima.
Matud sa nangulo sa protesta nga si Aplaya Barangay Chairman Rey Zaldy Maghanoy nga ilang liboton ang tibook sentro sa Poblacion, lungsod sa Jasaan aron ipanawagan sa mga pulis nga dalion ang pag-imbestigar sa kaso aron masuta kung kinsa ang utok sa krimen.
Samtang nagdumili una si Maghanoy sa pagkumpirmar kon kinsa ang suspek nga nagtinguha sa paghunos sa kinabuhi ni Kap. Zapanta.
Si Maghanoy miingon nga nasayod siya nga nakadawat ug hulga sa kinabuhi ang iyang higala apan ila lamang kining gibalewala tungod kay nagtoo sila nga usa ka malinawon nga lugar ang ilang gipuy-an.
Hisayran nga gipusil si Zapanta sa duha ka suspek diin naigo ang iyang ulo ug dughan nga maoy hinungdan sa iyang kamatayon sa ilang panimalay.
