CAGAYAN DE ORO CITY – Ilusad sa Xavier University (Ateneo de Cagayan) ang lapad nga rally batok death penalty karong adlawa.
Panguluhan sa mga Hesuitang Pari ang ipahigayon nga santos nga misa. Matud ni Nestor Bañuag, Advocacy Coordinator sa XU ginganlanan ang dakung kalihukan isip “STANDING UP FOR LIFE: No to the Re-imposition of Death Penalty”.
Kini nga kalihukan uluhan sa mga naglangkob sa mga magtutudlo, tinun-an , XU community, kaparian XU CSG ug ang SD Student Volunteer Formation Program.
Human sa rally, ipalanog ang panawagan sa pagsupak sa itukod nga casino sa syudad.
Una niini, giimbitar sa nasampit nga unibersidad si Bise Presidente Leni Robredo aron mohisgut sa importansya sa kalinaw, alayon sa ilang selebrasyon sa Social Development Week celebration nga nagtangag sa temang “Engaging the peripheries for inclusive development.”
Isip Key Note speaker, iyang gipaklaro ang pagkamahingdanon sa pagpakiglambigit ilabe na sa XU community ngadto sa mga marginalzed sectors.
Samtang, gibuksan sab sa tunghaan ang ilang ganhaan alang sa mga fora kundiin usa si Atty. Meong Cabarde sa Amnesty International ang nagtuki sa silot kamatayon.
Una niini, suportado sa grupo sa mga tinun-an ang inisyatiba sa maong tunghaan.
Babagan sa League of Filipino Students (LFS) ang pagpatuman sa death penalty sa nasud.
Alang kang Kristine Cabardo, Secretary General sa League of Filipino Students Northern Mindanao Region nga dunot na ang justice system sa nasud.
Dili sab benepisyaryo ang katawhan sa death penalty tungod kay klaro nga kini anti-poor.
Gidugang pa ni Cabarde nga kadto lamang nga kabus ang madali dali ug patay sa gobyerno itande sa mga adunahang makasala sa balaod sa Pilipinas.
Supakon usab sa grupo sa Gabriela ang posibleng pagpalabang sa silot kamatayon.
Gipasabot ni Rhodora Bulusan,Gabriela Secretary General Northern Mindanao nga ang mga bilanggoan gitukod aron mareporma ang mga nakasala.
Gikinahanglang serbisyohan sa mga kriminal ang ilang sala aron mabatian usab nila ang kasakit sa nadangatan sa ilang biktima.
Gitin-aw ni Bulusan nga kung kaniadto ganado ang mga pamilya sa rape victim sa death penalty apan, karon, mas gipili nila ang pagpangayog pasaylo ug life sentence.
Palig-onon ang justice system ug hatagan sa panginabuhian sa kabus ang nakitang sulosyon sa Kabataan Party aron dili maduso ang priority bill no.1 nga death Penalty.
Hugot nga nagtuo si Rep. Vennel Chemfoo sa Panalipdan Youth Northerm Mindanao ug Kabataan Party nga ang hinungdan sa daghang krimen mao ang kawad-on sa trabaho ug ang pagkutoy sa tiyan sa halapad nga ihap sa mga Pinoy.
Dugtong niini, may gipalugwa na nga sulat pamahayag ang simbahan batok sa nagligid nga pagduso sa death penalty sa nasud.
Gibutyag ni Wilson Amad, Vice Pres sa Catholic Evangelizers of Faith CdeO Chapter nga dili haum ang death penalty aron mahatagan sa tsansa nga magbayad sa nahimong sala ang usa kreminal.
Dumduman nga hugot nga gisupak sa simbahang katoliko ang paggamit sa silot kamatayon isip tipik sa mga argumento sa deterence ug retribution nga unang gipamugos ni Pres Rodrigo Duterte.
