Nagpahayag og pagsuporta ang Simbahang Katoliko sa padayong panawagan ni Pope Leo XIV nga undangon ang gyera ug ipatigbabaw ang kalinaw, bisan pa sa nagkabanggang pahayag tali sa Santo Papa ug sa US President Donald Trump.
Kini ang gisulti ni Wilson Amad, usa ka lay theologian.
Matod ni Amad, ang Santo Papa nagbarug isip tigpahibalo sa ebanghelyo, dili aron palipayon ang mga lider sa kalibutan, kondili aron isulti ang kamatuoran ug mokondena sa mga inhustisya sama sa gubat nga supak sa kabubut‑on sa Diyos.
Dugang pa niya, ang lig‑on nga baruganan ni Pope Leo XIV nagpakita nga wala siya mahadlok bisan pa sa impluwensya sa gamhanang mga lider ug nagmatinud‑anon sa iyang tahas isip pangulo sa Simbahan.
Usa kini ka ehemplo sa mga Katoliko nga dili angay mahadlok sa pagsaway sa dautang nahitabo sa katilingban, ilabi na kon adunay paglapas sa hustisya ug kalinaw.
Tungod niini, giingon ni Amad nga ang panawagan sa Santo Papa nagpahinumdom nga ang tinuod nga liderato nagbarug sa kamatuoran, kalinaw ug pagpanalipod sa kinabuhi.
