Katunga nalang ang bayran sa tanan dokumento nga lukaton sa Securities and Exchange Commission – Cagayan de Oro Extension Office (SEC-CDOEO).
Namahayag si Atty John Henri De Veyra, legal counsel sa SEC-CDOEO nga ang pagkuha sa opisyal nga dokumento sama sa authenticated ug plain copies kunhuran sa50 porsyento.
Subay kini sa SEC Memorandum Circular No. 6, Series of 2025, nga nag-usab sa fee structure aron mas mapadali ang access ug mahimong barato ang tanan corporate records alang sa publiko ug mga negosyo.
Kauban sa maong reporma ang full deployment sa SEC Zuper Easy Registration Online (SEC ZERO), usa ka digital platform alang sa company registration nga nagwagtang sa panginahanglan sa hardcopy submission ug notarization.
Ang sistema naggamit sa eSAP alang sa digital authentication sa mga dokumento. Dugang pa, gilunsad usab ang eAMEND Portal alang sa digital nga pagproseso sa mga amendments sa articles of incorporation ug by-laws, nga mandatory na gamiton sukad Pebrero 23, 2025.
Gisiguro sa SEC nga ang ilang mga digital platform lig-on ug sumusunod sa data protection standards.
Sumala sa pinakabag-ong fee structure sa SEC nga epektibo sugod Hulyo 1, 2025, mao na kini ang mga presyo:
- Physical ug authenticated copies sa company filings (sama sa Articles of Incorporation, By-laws, General Information Sheet, ug uban pa):₱1,000 kada kopya, gikan sa ₱2,000.
- Plain copies sa maong mga dokumento: ₱750 kada kopya, gikan sa ₱1,500.
- Authenticated copies sa ubang dokumento: ₱50 kada pahina, gikan sa ₱100.
- Plain copies sa ubang dokumento: ₱25 kada pahina, gikan sa ₱50.
- Digital authenticated copies: ₱625 kada kopya, gikan sa ₱1,250.
- Digital plain copies: ₱375 kada kopya, gikan sa ₱750.
