CAGAYAN DE ORO CITY – Nagkanipis ang anggulo nga ‘rido’ o dumot sa pamilya ang rason kon nganong gipusil-patay si Cogon Police Station commander Police Capt Abdulcahar Armama sa Brgy Bulua ning syudad sa miaging semana.
Kini human nasuta sa gitukod nga Special Investigation Task Group Armama nga walay kakontra ang biktima ug bisan ang ilang pamilya.
Namahayag si COCPO/SITG spokesperson Lt Col Evan Viñas nga kamulo na nila nga gipaubos sa ‘enhancement’ ang kuha nga CCTV footages sa crime scene aron matumbok ang persons of interest sa maong kremin.
Nagbaton na usab ang SITG sa pipila ka testigo nga dako’g matabang sa pagsulbad sa kamatayon ni Armama.
Kabahin sa padayong gikonsiderar sa SITG nga posibleng anggulo sa kremin ang kampanya ni Armama batok sa illegal drugs ingon man sa mga illegal nga pasugal ug pagpalusot sa mga sigarilyo ubos sa iyang area of responsibility.
