CAGAYAN DE ORO CITY- Gitukod na sa kapolisan ang Special Investigation Task Group o SITG nga maoy mag-imbestigar sa pagpatay kang Napaliran Brgy Capt. Claver Miral diha sa Jasaan, Misamis Oriental.
Si Balingasag Police Station commander Police Capt Ismael Virgel Gundaya miingon nga ubay-ubay nga anggulo ang ilang giimbestigaran sa posibleng motibo sa pagpatay kang Miral nga nagpuyo sa Brgy Napaliran sa maong lungsod.
Miingon si Gundaya nga maoy mangulo sa SITG si Misamis Oriental PNP Director Police Col Rolando Destura diin kaabag ang CIDG-10 ug NBI-Northern Mindanao.
Dumduman nga gipusil ang biktima sa duha ka lalake nga sakay sa motorsiklo diin nakaangkon kini’g lima ka samad-pinusilan sa lawas nga hinungdan sa iyang kamatayon sa miaging Domingo sa gabii.
Samtang motabang ang asosasyon sa kapitan sa pagsuta sa motibo sa pagpatay kang Miral diha sa Jasaan, Misamis Oriental.
Kini ang kompirmasyon ni Balingasag ABC President Cocoy Almendrala sa kalit nga kamatayon sa ilang kauban.
Sumala ni Almendrala nga magpatawag siya’g emergency meeting sa tanan niyang mga miembro kauban ang pulis aron ilang mahisgutan ang posibleng motibo sa pagpatay kang Miral.
Si Almendrala miingon nga wala sila’y kasayuran kon may hulga nga nadawatan si Miral ilabina nga wala kini kaaway.
Nanghinaut ang presidente sa ABC nga mahatagan hustisya ang kamatayon sa ilang kauban ug mapadali ang pagsulbad sa kaso.
