CAGAYAN DE ORO CITY – Gitutukan sa special investigation task group o SITG nga kalambigitan sa ilegal nga droga,negosyo ug politika ang rason kon nganong gi-ambush-patay si Clarin,Misamis Occidental Mayor David Navarro sa Cebu City.
Kini tungod sa pagsilbing no.8 high value target o HVT ni Navarro nga unang gibulgar ni Pres Rodrigo Duterte nga naa sa narcolist politicians.
Miingon si Cebu City Police Director Col Gemma Vinluan nga dugay nang nakadawat usab sa mga bahad sa kinabuhi si Navarro sa Misami Occidental.
Si Navarro ang kasuhan unta’g act of lasciviousness,usurpation of authority ug physical injury sa piskalya dihang gi-ambush sa 15 ka tawo sa Cebu City sa miaging semana.
Samtang gitawag nga linu-og ug dili tawhanon sa pamilyang Navarro ang brutal nga pag-ambush-patay kang Navarro.
Kini ang dismayado nga pahayag sa igsoon sa mayor nga si Dan Navarro gumikan sa hitabo.
Miingon si Navarro nga dili tinood nga nalambigit sa ilegal nga droga ang ilang igsoon kay mismo ang CIDG ang makapamatuod niini.
Ihaya ang patay’ng lawas ni Navarro sa lungsod sa Clarin diin gilauman nga nakaabot na ning orasa sa Misamis Occidental.
Samtang nakighiusa ang Ozamiz Diocese sa panawagan sa pamilya ni Navarro nga mahataga’g hustisya ang kamatayon niini sa Cebu City.
Sa interview sa Bombo Radyo, gibutyag ni Archbishop Martin Jumoad nga dili makatarunganon ang pag-ambush patay sa alkalde bisan sa mga nanggawas nga report nga nalambigit kini sa illegal nga droga.
Siya miingon nga nagkinahanglan gihapon ang mayor sa due process nunot na sa mga kontrobersiya nga iyang giatubang ug mas maayo nga ang korte maoy maghukom sa iyang mga kasaypanan.
Kahinumduman nga gi-ambush si Navarro dihang padulong kini sa piskalya alang sa inquest proceedings human niya gikulata ang usa ka masahista.
Kabahin usab siya sa listahan ni Pres Rodrigo Duterte isip narco-politicians.
