CAGAYAN DE ORO CITY – Tukuron sa Cagayan de Oro City Police Office ang Special Investigation Task Group o SITG nga maoy mangulo sa pag-imbestigar sa pagpusil sa menor de edad nga mabdos atubangan sa Hall of Justice, Brgy. Carmen ning syudad.
Miingon si Carmen Police Station Commander Police Major Ian Borinaga nga mismo si City Police Director Colonel Henry Dampal ang mopatawag oras nga mahan-ay nila ang maong task group.
Una niini, nagtoo ang mga imbestigador sa COCPO nga dako ang kalagot sa mastermind sa krimen batok sa gipusil nga menor de edad.
Samtang gikompirmar ni COCPO spokesperson Ivan Viñas nga gimando ni Dampal ang walay pu-as nga imbestigasyon sa pagpusil sa 16 anyos nga mabdos sa Brgy. Carmen ning syudad.
Gibutyag ni Viñas nga dili lamang usa ka anggulo ang ilang gitutukan apan lakip na ang anggulong bangi sa pamilya sa maong biktima ug ang bangi sa maong biktima sa iyang amo nga si Police Major Albart Tare.
Namahayag si Viñas nga gihatagan sa police escort ang maong biktima ilabina nga fatal ang iyang nadawat nga igo pinusilan ug kursunada ang mga suspek nga siya patyon.
