CAGAYAN DE ORO CITY-Gihagit karon sa Special Investigation Task Group o SITG-Rotoras si detained Architect Rey Galua nga itug-an na ang iyang nasayran sa kamatayon ni late USTP president Dr Ricardo Rotoras ning syudad.
Kini human miabot na sa kapin tulo ka bulan apan pabiling pakyas pa gihapon ang SITG pagtumbok sa tinud-anay nga utok sa kamatayon ni Rotoras.
Miingon si SITG-Rotoras spokesperson C/Insp Mardi Hortillosa nga wala mohunong ang mga imbestigador pagpangita’g paagi aron masulbad ang Rotoras killing.
Kini ang hinungdan nga wala usab nila lung-i si Galua pagkumbinsir nga itug-an na ang posibleng mga nasayran niini.
Kini ilabina nga siya ang prime person of interest sa pagpusil-patay kang Rotoras sa syudad niadtong Disyembre 2017.
