CAGAYAN DE ORO CITY – Giporma na ni COCPO City Police Director Col Aaron Mandia ang special investigation task force o SITG aron maoy molusad sa lapad ug lawom nga imbestigasyon kon nganong gipusil-patay ang magsisibya nga si Federico ‘Ding’ Gempesaw mismo sa tugkaran sa ilang balay sa Macanhan,Brgy Carmen ning syudad.
Gibutyag ni Police Regional Office 10 spokesperson Lt Col Michelle Olaivar nga tuyo niini nga mapadali ang pagsulbad sa kamatayon sa biktima kinsa radio-blocktime sa dakbayan.
Miingon si Olaivar nga gitahasan ni Police Regional Office 10 regional director Brig Gen Benjamin Acorda Jr si Mandia nga magbaton sa dinalian nga paghatag hustisya sa gidangatan ni Gempesaw.
Si Gempesaw ang igo lang unta mag-ilis gikan sa iyang pag-maneho sa giabangang taxi sa dihang gihulatan sa motorcycle in tandem suspects sa ilang balay ug gipusil sa duha ka higayon sa ulo gamit ang kalibre 45 nga armas hinungdan nga dead on the spot kini sa miaging semana.
Dugtong niini,gihinaut sa pamilya ingon man kabanay ug mga higala nga dili lang kutob sa pagkaporma ang special investigation task force apan magbunga sa maayong resulta aron mahatagan sa hustisya ang kamatayon sa magsisibya nga si Gempesaw.
Kini ang hagit sa suod nga higala ni Ding nga si Macasandig Brgy Kag Nixon Baban nunot maong linu-og nga hitabo.
Gibutyag ni Baban nga sa taas nga panahon nga sila nagkaila ug nagkauban ni Ding,masulti gyud niini nga simpli nga tawo lamang kini ug wala mag-abusar sa katungdanan.
Kini tungod kay bisan sa dakon nga katungdanan ni Gempesaw sa city hall kaniadto nga mahimo niya nga abusaran aron mabulahan apan giingong mas gipili niini nga kabus lamang gihapon.
Si Ding ang gitakdang ilubong sa Golden Haven sa Hulyo 7 ning tuiga.
