CAGAYAN DE ORO CITY – Aktibo nang naglihok ang gitukod nga SITG MSU Dimaporo Gymnasium Explosion aron paspasan ang pagsulbad sa nahitabong pagpamomba sa teroristang grupo sa gymnasium sa Mindanao State University Main Campus sa Marawi City, Lanao del Sur.
Kini ang kompirmasyon ni PNP chief Gen Benjamin Acorda Jr nga personal gitahasan ni Pres Bongbong Marcos aron sutaon ang dagan sa imbestigasyon sa hitabo kagahapon sa buntag.
Namahayag ang heneral nga gawas sa mga namatay,anaa pa sa lima ka biktima ang kritikal ang kondisyon samtang nakagawas na sa Amai Pakpak Medical Center ang 35 nga apil sa napiskahan sa mga tipaka sa IED gamit ang bala sa 60mm mortar.
Samtang maoy person of interest na sila nga gitutukan kabahin sa EID explosion.
Dugtong niini,gimanduan sa Camp Crame General Headquarters ang tanang regional offices sa PNP sa Mindanao nga isaka sa red alert status ang ilang ipatuman nga seguridad.Kini sa tuyo nga dili masubli ang pagka-bombahi sa gymnasium nga mikalas sa upat ka kinabuhi.
Miingon si PNP Directorial Staff Chief Maj. Gen. Emmanuel Peralta nga apil sa giisa sa hightened alert ang tanang unit sa National Capital Regional Police Office epektibo kagahapong adlawa.
Samtang mohimo sa personal nga security command conference si AFP chief of staff Gen Romeo Brawner Jr kuyog ang kadagkuan sa PNP sa mismong Marawi City karong buntag.
Kini aron makuha ang ulahing kalambuan sa operasyon sa tropa batok sa grupo sa mga terorista nga gitoohang utok pagbomba sa MSU-Dimaporo gymnasium diin mikutlo sa upat ka kinabuhi ug 50 ang samaron kagahapon sa buntag.
Miingon si Brawner nga subay unya sa ilang makuha nga dagan sa imbestigasyon sa hitabo,magsilbi kining basehan kon angay nga personal modalikyat si Pres Bongbong Marcos sa Marawi City aron ipaabot ang iyang pasubo ug pakigduyog sa mga pamilya nga namatyan ug mga estudyante nga samaron sa maong pagpamomba.
