CAGAYAN DE ORO CITY – Human sa siyam ka tuig nga pagtagu-tago, malampusong nadakpan sa Criminal Investigation and Detection Group kon CIDG Bukidnon ang usa ka suspek nga anaa sa ika-8 sa ihap sa most wanted person sa maong probinsya.
Giila ni Police Col. Roel Lami-ing ang suspek nga si Nestor Catalan, usa ka senior citizen, mag-uuma ug residente sa Sitio Mahayag, Brgy. Kitobo, Kitaotao, Bukidnon.
Gibutyag ni Lamiing nga nadakpan si Catalan sa mga sakop sa CIDG human nagpositibo ang ilang gihimong surviellance sa lugar kundiin kini ulahing nakit-an.
Nag-atubang sa kasong murder ang suspek ug dunggon kini sa sala ni Presideng Judge Pelagio Estopia, sa RTC-10, Branch 8 sa Malaybalay City Bukidnon. Walay piyansa nga girekomendar ang korte batok sa suspek.
