Nagpasalamat ang mga organizer sa Sinag Liga Asya (SLA) basketball tournament ngadto sa lokal nga panggamhanan sa Cagayan de Oro ilawom sa liderato ni Mayor Rolando “Klarex” Uy sa ilang courtesy visit sa iyang opisina, kagahapon.
Gipadayag sa SLA organizers ang ilang mainiton nga pagtimbaya sa suporta sa mayor, ilabi na sa pag-host sa SLA-Junior World Showcase (Mindanao Cup) nga gipahigayon sa syudad.
Giila usab sa SLA ang dakung tabang ni Barangay Carmen Captain Raineir Joaquin “Kikang-KapKik” Uy sa maong kalihokan, nga nagpalig-on sa grassroots sports development sa rehiyon.
Sumala sa mga organizer, ang ilang panagtagbo nag timailhan sa mas lig-on nga panag-uban tali sa SLA ug sa lokal nga panggamhanan, nga nagtinguha sa pagpalambo sa mga atleta ug sa pagdasig sa kabatan-onan sa gugma sa sports.
Si Mayor Klarex, sa iyang bahin, miila usab sa dakung kadungganan nga iyang nadawat gikan sa liga ug mipadayag sa iyang padayon nga suporta sa programa.
Hisayran nga ilusad ning adlawa ang finals sa torneo sa USTP Gym ug Xavier University Gym.
