(Update) CAGAYAN DE ORO CITY – Daw nakalusot sa bug-at nga sa obligasyong kriminal ang aktibong pulis nga unang nakuhaan sa mga sigarilyong inismagol nga sakay sa pribadong sakyanan sa Purok 1,Brgy Butadon,Kapatagan,Lanao del Norte.
Kini tungod kay milugwa sa imbestigasyon nga dili iya ni Patrolman Johaiber Mamiscal Tawakal ang mga sigarilyo apan gipanag-iya sa iyang kaubang sibilyan nga si Junior Hadji Usman nga giingong nakisakay lang kaniya dihang naharang sa 2nd Provincial Mobile Force Company.
Miingon si Police Regional Office 10 spokesperson Major Joann Navarro nga dili gihapon makalikay si Tawakal kay aduna gihapon kini atubangong kaso sulod sa PNP.
Kini tungod kay makonsiderar nga grave misconduct violation ang gihimo sa maong pulis rason mag-atubang kini sa kasong administratibo.
Una nang naharang ang sobra 480-mil pesos nga sigarilyo nga gikan pa’g Zamboanga City ug ipangbaligya unta sa Lanao del Norte.
Kabahin sa atubangan sa mga dinakpan ang pagsupak sa Graphics Health Warning Act.
