CAGAYAN DE ORO CITY – Wala kalusot ang mini-van nga kargado sa smuggled cigarettes bisan nga gilikayan ang checkpoint sa Purok 4,Brgy Bansarvil 1,Kapatagan,Lanao del Norte.
Kini human paspas nalabay sa 2nd Provincial Mobile Force Company-Lanao del Norte ang impormasyon sa laing checkpoint aron madakpan ang nagpalusot niini.
Napugos pagsulod sa quarry site ang van diin gibiyaan kini sa nagmaneho apil ang mga sigarilyo nga nagkantidad sa 160-mil pesos.
Gitakdang itugyan sa Bureau of Customs Iligan City ang maong mga kontrabando alang sa dugang sunod nga mga lakang.
Una nang gitahas ni Police Regional Office 10 Director Brig Gen Jaysen De Guzman nga ipalig-on pa ang anti-smuggling operations ni PNP chief Gen Rommel Marbil aron mapuhag ang mga sindikato nga nagpaluyo niini.
