CAGAYAN DE ORO CITY-Ipakatag sa kapolisan ug militar ang snipers sa pipila ka strategic area diin himon ang city core fiesta activities sa syudad sugod ugmang adlawa.
Kini human gitukod ni City Mayor Oscar Moreno ang Task Force Higalaay aron masiguro nga luwas ang katawhan nga makigduyog sa kapistahan ni Sr San Agustin sa Agosto 28 ning tuiga.
Miingon si City Police Director Sr/Supt Nelson Aganon nga mohimo na sila’g inspection sa mga lugar nga pahimutangan sa dagkong aktibidad sama sa carnival parade,Higalaay Civic Military parade ug mismong kapistahan ni Sr San Agustin sunod semana.
Samtang gihupay sa 4th ID,Philippine Army ang kabalaka sa publiko kabahin sa bahad sa mga terorista nga mohimo’g kagubot sa kapistahan sa syudad sunod semana.
Kini human gibutyag ni 4th ID commander Maj Gen Ronald Villanueva nga walay napanid-an nila nga lakang sa mga terorista nga mosabwag kagubot sa syudad.
Miingon si Villanueva nga motabang usab ang katawhan sa pag-mintinar sa kahusay’g kalinaw sa syudad.
