CAGAYAN DE ORO CITY – Balik-normal na ang tanang kalihukan ilabina sa mga pagka-klase ang mga magtutudlo ug ang sobra 14-mil ka estudyante sa Mindanao State University Marawi epektibo ning adlawa.
Kini subay sa rekomendasyon sa govt state forces ug pagtutalimbang sa mga opisyal sa MSU main campus sobra sa ka semana gikan sa bombing incident nga gikamatay sa upat ka tawo ug 72 ang samaron.
Miingon si MSU Marawi spokesperson Atty Shidik Abantas nga nakuha na nila ang tanang mga estudyante gikan sa tagsa-tagsa nila nga lokasyon aron motambong na sa ilang mga klase.
Gipaniguro sa administrasyon sa MSU nga kon unsa man ang nahitabo sa Mohammad Dimaporo Gymnasium sa miaging Domingo,dili na kini masubli kuyog sa pag-abag sa mga sundalo’g pulis nga nakabantay sa bisinidad sa ilang tunghaan.
Dugtong niini,gipaniguro ni Police Regional Office 10 Director Brig.Gen Ricardo Layug Jr nga dili malutsan ug masabotahe ang kahusay’g kalinaw dinhi sa rehiyon.
Kini bisan sa nahitbong bombing incident sulod mismo sa MSUy main campus diin mikalas sa upat ka kinabuhi ug 72 ang samaron didto sa Marawi City sobra semana na ang nakalabay.
Miingon si Layug nga bisan wala pa nahitabo ang improvised explosive device explosion sa Mohammad Dimaporo Gymnasium sa Marawi City,daan nang naniguro paghugot-seguridad ang Camp Alagar alayon sa mga kalihukan sa kapaskuhan ug pagsugat sa bag-ong tuig sa katawhan.
Nunot niini,mas midaghan pa ang gikatag nga mga pulis sa nagkadaiyang mga lugar diin dagsa ang katawhan sama sa shopping malls,public terminals,mga merkado ug ilabina sa mga kasimbahanan.
