CAGAYAN DE ORO CITY – Nakapauli na ang sobra 20 ka pasahero nga naglakip sa jeepney driver nga unang nahaybol sa kurbada nga bahin sa Zone 5 Kianos,Brgy Kiliog,Libona,Bukidnon.
Gibutyag ni Police Maj.Jisselle Longgakit,tigpamaba sa Bukidnon PNP nga may usa na lang ka babaye nga nagpabilin sa ospital alang sa dugang medikasyon.
Miingon si Longgakit nga posibleng usab nga walay tulubagon ang drayber nga si Cornelio Danggoy kay dili intresado ang mga biktima ug gininakan sa duha ka batang namatay nga moduso’g kasong kriminal batok kaniya.
Una nang nawad-an sa preno ang jeep kay kusog kining mibahada gikan sa pagtambong sa lubong sa Libona aron unta mopauli na sa Brgy Sambulawan,Laguindingan,Misamis Oriental sa miaging Miyerkules sa buntag.
