CAGAYAN DE ORO CITY – Gitakdang maka-benepisyo sa balor 40 pesos nga usbaw sa inadlaw nga suhulan ang 152-mil 924 ka trabahante gikan sa private establishments ug laing 54-mil 851 domestic workers dinhi sa Northern Mindanao.
Kini human hatagi sa Regional Tripartite Wages and Productivity Board 10 ang mga pribadong trabahante sa duha ka tranches sa usbaw sa suluhan nga mo-epekto sa Northern Mindanao sulod ning tuiga.
Gilugwa ni DOLE Secretary Silvestre Bello III ang impormasyon gikan sa RTWPB 10 nga anaa sa 40 pesos ang umento sa suhulan nga madugang sa inadlaw nga kinitaan sa mga mamumuo sa rehiyon.
Gibutyag ni ALU-TUCP 10 regional operation officer Nicanor Borja nga unang ipatuman ang 25 pesos nga wage increase human sa 15 ka adlaw nga pagpublikar niini sa nag-unang mantalaan sa nasud.
Laing 15 hangtod 22 pesos nga dugang sa kinitaan sa private workers pag-abot sa Disyembre 16 ning tuiga.Kini nga wage increase ang epekto sa gipangayo sa ALU-TUCP nga 413 nga dugang suhulan sa mga trabahante nga naduso nila sa RTWBP 10 ning tuiga lamang.
Kabahin sa gawas sa Cagayan de Oro,susama nga umento ang dawaton sa Iligan City,Malaybalay, Valencia, Gingoog, El Salvador,Ozamiz, Tagoloan, Villanueva, Jasaan, Opol, Maramag, Quezon, Manolo Fortich ug Lugait rason nga 405 na ang ilang mahimong adlawan samtang ang agriculture sector anaa sa P393.
Samtang nakurat ang hugpong sa mga Filipino-Chinese businessmen sa aprobado nga dugang usbaw suhulan sa mga mamumuo dinhi sa rehiyon.
Kini human miuyon lamang sila nga hatagan sa 30 pesos nga dugang umento sa inadlawan ang mga trabahante bisan sa gipangayo nga 413 pesos sa labor sector.
Gibutyag ni Antonio Uy,presidente sa Misamis Oriental Filipino-Chinese Chamber of Commerce Incorporated nga wala pa sila’y opisyal nga kopya sa aprobado nga usbaw sa suhulan gikan sa DOLE.
Una nang nagtagbo ang sektor sa labor,business ug RTWPB ning syudad aron dunggon ang wage petition nga gisang-at nga gitumong sa mga mamumu-o dinhi sa rehiyon.
