CAGAYAN DE ORO CITY – Nakabalik sa ilang kabalayan ang sobra 200 kapamilya nga apektado sa kalit nga pagdagko sa mga balod sa kadagatan kuyog ang kusog nga hangin sa coastal barangays sa kalungsuran sa Misamis Oriental.
Kini maoy kompirmasyon ni Misamis Oriental Provincial Disater Risk Reduction and Management Department head Fernando ‘Sotsot’ Dy Jr sa interbyu sa Bombo Radyo kabahin sa hitabo kagabii.
Siya miingon nga kabahin sa apektado sa pagdagko sa mga balod ang katawhan gikan sa pipila ka coastal barangays sa Tagoloan;Villanueva; Jasaan;Balingasag; Magsaysay;Libertad ug Alubijid epekto sa hanging habagat.
Miingon si Dy nga napasamot ang buga sa hanging habagat kay nagtaob usab ang dagat hinungdan nga mikawas ang tubig-dagat ug napadulong sa daghang kabalayan.
Siya miingon nga gawas sa mga pamilya nga napugos pagbiya sa ilang mga balay; nadamyos usab ang 143 ka balay kay nasudlan sa balod ug nangaguba ang kapin 90 ka pumpboats.
Hinoon,walay bisan usa ka residente nga samaron,missing o namatay sa pagdagko sa balod sa kadagatan.
Gibalik na usab ang mga normal nga biyahe sa mga sakayang dagat gikan sa pantalan sa Balingoan padulong sa isla sa Camiguin.
Hisayrang daan nang naghatag abiso ang provincial government pinaagi sa nagkadaiyang municipal disaster offices sa giisa nga gale warning aron kalikayan mahinayak pagpalawod ang mga mananagat sa kadagatang sakop sa Misamis Oriental.
