CAGAYAN DE ORO CITY – Nawad-an sa mga balay sa ikatulong higayon ang illegal settlers nga mi-okupar sa dul-an 7 ka ektaryang yuta diha sa Bloke 8,Purok 11,Sitio Baloi,Brgy Tablon ning syudad.
Kini human sugu-a sa korte ang sheriff kuyog ang mga otoridad nga i-bakante na ang maong yuta gumikan sa sumbong sa tag-iya niini.
Gibutyag ni Tablon Punong Brgy Billy Auza nga dili na makamahay ang gatusang residente o pamilya kay una na sila nga nasayod nga ilegal ang pagsulod nila sa maong yuta.
Gani,mihatag pa sa financial assistance ang mismong tag-iya sa yuta aron lamang boluntaryo nga mohawa ang maong mga tawo nga ang uban naggikan pa sa Misamis Oriental ug Bukidnon.
Samtang napugngan sa mga otoridad ang diriyot pag-ulbo sa tensyon tali ngadto sa pipila ka pamilya o residente nga namugos nga sila ang tag-iya sa yuta sa lugar.
Gibutyag ni City Mobile Force Batallion Company commander Lt Col Jophet Paglinawan nga napugngan ug hingpit nila nakumbensir ang usa ka grupo nga mohimo’g kagubot kay ila kining napasabot nga mando sa korte ang gipatuman sa lugar.
Una nang dili maka-avail sa relokasyon ubos sa ‘Lina Law’ ang mga apektadong residente kay anaa pa lamang sa napulo ka tuig ang labing dugay nga nag-okupar sa lugar.
Kini na ang ikaupat nga demolasyon nga natigayon sa syudad gumikan sa legalidad sa mga yuta nga gi-okupar sa informal settlers ning tuiga.
Hisayrang kabahin ang informal settlers nga seryosong mga suliran nga gisagubang sa city govt sa dugay nang panahon sa dakbayan.
