CAGAYAN DE ORO CITY – Gipangunaya’g susi ni Police Regional Office 10 Director Brig Gen Jaysen De Guzman ang mga simbahan,public transport terminals ug pantalan ilabina ang nag-unang pilgrimage sites nga nakabase ning syudad.
Kini alayon sa pagdagsa sa katawhan aron ilang ipaubos ang mga kaugalingon sa pagpamalandong sa pasyon,pagpasakit ug kamatayon ni Kristo ning semana santa.
Miingon si Police Lt Col Evan Viñas,tigpamaba sa Cagayan de Oro City Police Office o COCPO nga taliwala sa sobra 25-mil ka deboto nga midalikyat sa bukid sa Malasag sa Brgy Cugman ug Our Lady of Guadalupe Shrine sa tri-boundaries sa Brgy Tablon, Brgy Agusan ug Brgy Balubal,walay mga panghitabo nga nakabalda sa pagbalaan ning semanaha santa.
Siya miingon nga apil usab sa ilang gihataga’g pagtagad sa kapolisan ang paghatag atensyon sa mga establisemiento ug residential houses nga dili imposible nga atakehon sa mga grupo sa dautang mga tawo.
Una nang giisa sa PRO 10 ang pinakataas nga alerto sa Northern Mindanao region nunot sa mga kalihukan sa semana santa.
Sa pika bahin,gipadumduman ang mga deboto nga mosanong sa gilatag nga mga gabayan kung moduaw sa nagkadaiyang pilgrimage sites nga nahimutang sa pipila ka bahin sa Misamis Oriental.
Kini sa tuyo nga dili mapugngan ang ilang mga pagpamalandong ning semana santa.
Namahayag si Fernando ‘Sotsot’ Dy Jr,head sa Misamis Oriental Provincial Disaster Risk Reduciton and Management Office o PDRRMO nga tumong sa pagsaka sa blue alert status sa provincial govt nga tanan alerto batok sa bisan unsa nga panghitabo.
Siya miingon nga apil usab sa ilang gipadumduman ang mga biyahidor nga igmat sa mga pagbiyahe aron dili mahiagom sa mga dugu-ong disgrasya.
Apil sa gibuhusa’g hugot nga seguridad ang Divine Mercy Shrine sa El Salvador City diin nilibong mga deboto gikan sa nagkadaiyang bahin sa Pilipinas ang gaduaw matag-semana.
Dugtong niini,giaghat sa mga tigdumala sa Divine Mercy Shrine nga dili magpasagad ang mga deboto taliwala nga sobra ka luwas ang ilang seguridad sulod sa ilang bisinidad sa Brgy Ulaliman,El Salvador City,Misamis Oriental.
Partikular nga gitumbok ni Debbie Gatab,information officer sa Divine Mercy Shrine ang posibleng pagpanggawas sa mga halas ug ubang mga insekto nga hayan makapatay sa tawo nga mapaakan niini.
Siya miingon nga taliwala nga bastante ang gipakatag nga security personnel palibot sa giilang balaan nga lugar apan angayang dili magpasagad ang mga deboto pag-abot sa ilang kaugalingong kaluwasan.
Hisayrang sobra 20-mil ka deboto na ang naka-bisita ug nakahimo’g mga pangaliya sa maong lugar sukad pa kagabii.
