CAGAYAN DE ORO CITY – Gusto sa liderato ni Police Regional Office 10 Director Brig Gen Jaysen De Guzman nga walay mga pulis nga adis-adis ubos sa iyang pagdumala sa Northern Mindanao.
Kini ang rason nga igo sa pagsulod sa bag-ong tuig, gipaubos sa surprise drug test ang 953 ka pulis gikan sa Cagayan de Oro City Police Office ug Regional Headquarters sa Camp Alagar,Brgy Lapasan ning syudad.
Gibutyag ni De Guzman nga nalatid sa Comprehensive Dangerous Drugs Act 2002 nga angayang ipaubos sa random drug testing ang mga opisyal ug mga empleyado batok sa ilegal nga droga.
Siya miingon nga ubos usab sa circular sa Civil Service Commission,angayang magsilbing drug free ang ilang mga opisina o trabahuan.
Hisayrang ang maong lakang kabahin sa padayong ‘oplan linis bahay’ aron gukdon kadtong mga pulis nga tiggamitan o tigbaligya sa ilegal nga droga.
