Namatay ang 43 ka pilot whale human ma-stranded sa baybayon sa Ngawi, duol sa Cape Palliser sa habagatang bahin sa North Island sa New Zealand, niadtong Huwebes.
Sumala sa Department of Conservation (DOC) sa New Zealand, kapin sa 20 ka balyena ang unang namatikdan nga na-stranded, diin upat niini ang buhi pa sa dihang miabot ang mga tigluwas.
Sumala sa Project Jonah New Zealand, usa ka organisasyon nga nagtabang sa pagluwas sa mga mananap sa dagat, nakigtambayayong na sila sa DOC ug sa lokal nga komunidad sa Māori aron susihon ang kahimtang sa mga balyena ug paningkamotan ang pagbalik sa mga buhi pa ngadto sa dagat sa panahon sa taas nga tubig.
Apan, sa ulahing pahibalo sa DOC niadtong Biyernes, Nobyembre 6, gikumpirma nga 43 ka balyena ang nakit-an sa baybayon gikan sa Ngawi hangtud sa Mangatoetoe ug gituohang walay usa kanila ang naluwas, samtang ang uban namatay na sa wala pa madiskubrehan ug ang mga buhi pa namatay usab sa maong adlaw.
Bisan pa nga sagad ma-stranded ang mga pilot whale sa New Zealand, nagpabilin nga wala pa hingpit nga natino ang hinungdan sa maong panghitabo. (raniel mahunyag)
