CAGAYAN DE ORO CITY – Gitapos na sa city govt ang mga pagduda nga namatay ang 73 anyos nga lolo tungod sa pagkatupuki niini gamit ang Astrazeneca vaccine sa syudad sa miaging adlaw.
Kini human nadawat ni City Mayor Oscar Moreno ang opisyal nga medico legal findings sa SOCO-10 pinaagi ni Lt Col Dr Christian Caballes diin nagsaysay nga walay kalabutan ang bakuna sa kamatayon sa biktima nga si Zoilo Joaquin Borcillo nga taga-Brgy Agusan ning syudad.
Gibutyag ni Moreno nga subay sa official findings,namatay ang biktima tungod sa pag-atake sa kasingkasing pipila ka minutos gikan sa pagsulod sa bakuna sa sa iyang lawas.
Samtang giklaro ni City Health Office head Dra Lorraine Nery nga wala sukad nakasinati sa blood clot ang utok sa senior citizen nga namatay pipila minutos gikan sa pagka-bakunahi niini ning syudad.
Kini sukwahi sa mga pagtoo sa uban kay ilang gi-konek sa pipila ka senior citizens nga namatay sa Turkey kay nagka-blood clots human nahatagan sa Astrazeneca vaccine.
Miingon si Nery nga koneksyon sa sakit sa kasingkasing ang namatyan ni Borcillo nga naghatag sa dakong kasub-anan kanila dinhi sa dakbayan.
