“Sorry Na lang”, kini ang tubag ni Presidente Ferdinand Marcos Jr sa mga ka-alyado nga masapon nga nangurakot sa pundo sa gobyerno.
Sa labing lab-as nga podcast sa presidente siya miingon nga nabalaka siya sa nagkabaga nga anomaliya sa korapsyon nga nagpalibot sa mga flood control projects sa nasud.
Maoy iyang gikasuk-an ang kadtong mga proyekto nga palpak, “guni-guni lang”, ug kadtong wala pa nahuman nga nangaguba na.
Namugos si Marcos nga dili niya pasayloon bisan ka-alyado pa niya ang politiko kung mapamatud-an nga nalambigit sa raket ug kickback sa mga proyekto.
Gisaway sa presidente ang mga opisyal nga nagpakabana lang sa ilang kaugalingong bulsa ug nakigkunsabo aron kawaton ang pondo sa katawhan.
Miingon si Marcos, sila ang angayng maulaw sa mga Pilipinong nabiktima sa pagbaha ug sa mga kabataan nga maoy magbaguod sa pagbayad sa utang sa Pilipinas gumikan sa ilang pagpangurakot.
Gimanduan na sa presidente ang Department of Public Works and Highways sa pagsumiter sa listahan sa tanan flood control projects sa miaging tulo ka tuig, aron masusi ug ma-audit.
Andam si Marcos nga ipakita sa publiko ang resulta sa iyang gipangayo sa DPWH.
