CAGAYAN DE ORO CITY – Gihagit sa taga-kapitolyo probinsyal ang city government nga walay palabyon pagpatuman sa mga ordinansa ilabina sa pagmintinar sa kalimpyo ug kahapsay sa dakbayan.
Kini ang mensahe ni Misamis Oriental Provincial Disaster Risk Reduction and Management Office head Ferdnando ‘Sotsot’ Dy Jr sa buhatan sa city hall nga nangbaklas sa pipila ka political materials o posters diin naka-imprinta ang hitsura’g pangalan ni 2nd District Sangguniang Panlalawigan Board Member Gerardo Sabal Jr.
Miingon si Dy nga angay walay pilion ang City General Services Office sa city hall sa pagpangbaklas kay daghan kini’g nabantayan nga poster paraphernalia nga nagkagidlay na lang apan inotil mahipos kon tinud-anay nga kahindik sa syudad ang hisgutanan.
Namahayag si Dy nga mangayo na lang siya’g pasaylo kon may nakalapas gikan sa probinsya apan hagit niini nga dili magpalingug-lingog ang hingtungdang buhatan sa city hall sa tinud-anay nga kahimtang sa kalimpyo sa dakbayan.
Una nang gipasabot sa buhatan ni City Mayor Rolando ‘Klarex’ Uy pinaagi sa iyang tigpamaba nga si Janboy Actub nga trabaho sa CGSO nga hipuson ang tanang poster materials nga nakahatag sa kahugaw sa hitsura sa dakbayan ilabina kon wala tugti sa pagpahimutang niini.
Sa pagkutlo ning balita, wala pa gihapo’y giluwatang opisyal nga pahayag si SP BM Sabal kon mismo siya ang dunay pagtugot o inisyatiba sa laing grupo ang pagpahimutang sa political posters nga nahimong isyu ning semanaha.
Dumduman nga sa miaging bulan, gi-presentar ni Misamis Oriental Governor Peter ‘Senior Pedro’ Unabia sila Sabal,Dy ug 1st District SP Board Member Wayne Militante nga kabahin sa mosulod sa Cagayan de Oro aron magpapili pagka-konsehal sa 2025 local elections.
