Giklaro ni Board Member Dexter Yasay sa ikaduhang distrito sa Misamis Oriental nga wala sila mag-ingon nga si Governor Juliet Uy ang nangulo sa illegal mining activities sa probinsya.
Sa iyang interbyu sa Bombo Radyo, siya miingon nga ang ilang tuyo mao lamang ang pagkuha og katin-awan sa kalambigitan ni Dodong Mendez, nga giingong son-in-law sa gobernadora, sa maong isyu.
Dugang pa niya, gusto lamang nila nga mahatagan og klaro kung unsa ang kalambigitan ni Mendez sa hisgutanang illegal mining nga nahitabo sa lungsod sa Initao.
Kini tungod kay matod pa, nahimo kining hisgutanan sa Barangay Limonda sa lungsod sa Opol, diin si Mendez giingong mao ang utok sa pagmina-mina sa lugar.
Gipunting usab niya nga ilang girespeto ang provincial government ug ang mga gihimo niini, apan nagtuo siyang dili na kinahanglan muabot pa sa Senado ang maong isyu.
Gani, kung mitunga lang matod pa ang mga nahisgutan nga mga empleyado, posibleng nasulbad na ang maong isyu.
