CAGAYAN DE ORO CITY – Ipatawag sa sangguniang panlalalawigan ang mga panig sa uyon ug supak sa kamulo nga nag-operate nga casino diha sa Grand Imperial sa Brgy Taboc,Opol,Misamis Oriental.
Kini human unang gipalanog ang kusganong pagsupak ni Cagayan de Oro Archdiocese Archbishop Jose Cabantan pinaagi sa iyang pastoral letter sa maong dugang balay-pasugalan gawas sa cockpit arena nga dugay nang naglihok sa maong lungsod.
Miingon si SP Majority Leader Board Member Gregorio Sabal III nga giporma nila ang committee of the whole nga panguluhan ni SK Federation Pres Jerome Soldevilla kinsa chairman sa games and amusement committee sa probinsya.
Gikompirmar ni Sabal nga walay nadawatan nga kompya ang SP kabahin sa tinguha kaniadto ug mismo na pag-operate sa proyekto sa Philippine Amusement Gaming Corporation o PAGCOR sa maong lungsod.
Samtang gikompirmar ni kanhi ABC president ug karon Opol Vice Mayor Louie Mark Neri nga wala moagi sa konsultasyon sa publiko ang pagsulod sa PAGCOR operated casino house sa ilang lugar.
Kini bisan kon tuig 2017 pa nalugwaan sa resolution of no objection o RONO ang maong balay-pasugalan diin kabahiya siya kaniadto sa nakapirma sa maong dokumento.
Miingon si Neri nga bisan sa naglugwa nga RONO apan wala sukad miagi sa kasamantangang langkob sa Sangguniang Bayan o SB ang representante sa Grand Imperial aron makabantay sila kabahin sa pagpursige nga mag-operate ang pasugalan nga duol sa simbahan ug tunghaan nga dakong supak sa balaod.
Sa pikas bahin,wala na’y angay konsultahon kon kagustuhan sa PAGCOR nga itukod ang ilang dugang balay-kalingawan sama sa casino sa usa ka lugar sama diha sa lungsod sa Opol.
Ingon ani ang pag-depensa ni Opol Mayor Max Seno nunot sa pagsupak sa simbahang Katolika ug mismong pipila ka residente sa pag-operate sa casino sa ilang lungsod.
Miingon si Seno nga kalambuan ug kaayuhan ang dala PAGCOR ug katungod sa mga sapian kon unsaon nila paggasto ang mga panalapi niini diin mabulahan ang ilang lungsod.
Dugang pa,dili kapugngan sa bisan unsa nga ordinansa o balaod lokal ang mga proyekto nga gusto ibubo sa PAGCOR sa usa ka lugar sama sa casino diha sa Opol,Misamis Oriental.
Kini subay sa hukom sa korte suprema tali sa kaso ni late City Mayor Pablo ‘Ambing’ Magtajas batok PAGCOR sa panahon nga duna unta’y itukod nga casino dinhi syudad niadtong dekada 90.
Gibutyag ni kanhi IBP-Misamis Oriental chapter president Atty Ed Cuaresma nga gawas kon e-repeal sa mga magbabalaod ang PAGCOR law ug mas hataga’g gahom ang local govt code of the Philippines,mahimo nga masupak ang katukuran sa casino sa lungsod sa Opol.
Dumduman nga napildi kaniadto ang syudad kaso pag-abot sa Court o Appeals hinungdang misaka kini sa korte suprema ug gi-resolba ang legal dispute sa isyu sa casino.
