CAGAYAN DE ORO CITY – Nalabtikan na usab ni Gov Bambi Emano ang miembro sa minoriya sa Sangguniang Panlalawigan samtang gipakayab ang nasudnong bandila o flag raising sa kapitolyo probinsyal kagahapong adlawa.
Kini human nalakbitan ni Emano ang mga proyekto sa kabarangayan ubos sa brgy empowerment program diin gisaway kaniadto sa grupo ni Vice Gov Jigjag Pelaez nga nakaabtang nila sa politika sa miaging piliay ning tuiga.
Miingon si Emano nga mas angayang e-dokumento ni Pelaez kuyog sila si Board members Jessa Mugot ug Frederick Khu ang nahimo sa probisnya aron maoy ipakita sa ilang nagsilbing principal.
Kini na ang ikaduhang higayon nga ginawong-nawong pagsaway ni Emano ang grupo ni Pelaez gumikan sa pagpanaway niini sa iyang mga programa sa lalawigan.
Samtang naanad na ug dili na madutlan ang mga balatian sa kampo sa oposisyon sa Sangguniang Panlalawigan sa mga paghinaway ni Emano ngadto kanila.
Kini ang tubag ni Board Member Jessa Mugot nga kabahin sa sentro sa mensahe sa gobernador kagahapong adlawa.
Miingon si Mugot nga wala na sila makurat sa mga giluwatang pahayag ni Emano apan dili kini makapahunong kanila sa pagtambong sa senemana nga flag raising sa kapitolyo probinsyal.
Namahayag si Mugot nga kuyugan nila si Emano sa mga programa niini bisan anaa sila sa oposisyon ilabina kon makita nila nga makahatag sa kaayuhan sa katawhan sa probinsya.
