CAGAYAN DE ORO CITY – Dili pa matumbok sa mga imbestigador ang hinungdan sa pag-ulbo sa sunog nga mikalas sa usa ka kinabuhi ug mi-angol sa laing usa sa Zone 8-A, Brgy Cugman ning syudad kagahapon sa hapon.
Giila ni Inspector BFP Cagayan de Oro spokesperson Fire Insp Samson Velarde sa Bureau of Fire Protection ang namatay nga 7-anyos nga si Melan Emmanuel Sacala Sabit kinsa usa matud pa ka special child.
Na-angol usab ang kauban niini sa pinuy-anan nga ang 33-anyos nga si Melanie Bajas human misulay luwas ang maong bata.
Giingong una nang nadala na pagawas sa ilang pinuy-anan ang bata, apan kalit kini nga mibalik sa iyang lawak hinungdang nalukong sa kalayo nga nag-resulta sa iyang kamatayon.
Ana-a sa ospital ang mga ginikanan sa biktima dihang natigayon ang sunog.
Samtang gibana-banang mo-abot sa tunga sa milyon ka pesos ang structural damage sa sunog.
Na-ugdaw usab sa maong sunog ang pinuy-anan nila ni Reggie Rivera ug Eva Hugo.
Samtang partially damaged usab ang pinuy-anan nila ni Antonia Sacala ug Williams Greg Sacala ug gilaumang mosaka pa ang damyos sa maong sunog samtang nagpadayon pa ang imbestigasyon sa mga otoridad.
