(Update) CAGAYAN DE ORO CITY – Nagpasulabi ang kasub-anan sa pamilyang Bolo sa gidangatan sa ilang minahal sa kinabuhi dihang natigayon ang dakong sunog sa Purok 10,Sitio Baloy,Brgy Tablon sa dakbayan kagabii.
Kini human wala na’y kinabuhing nakit-an sa mga nagrespondeng bombero sa Bureau of Fire Protection- Cagayan de Oro ang special child nga nag-akbo sa bawol sa pansayan nga si Reymart Bolo,21 anyos nga nagpuyo sa lugar.
Namahayag si Tablon Punong Barangay Romeo Bacarro nga dili mapasagdan ang namatay’ng biktima ug ang ubang nasunugan kay anaa ang ilang dinaliang tabang samtang wala pa’y labot niini ang ayuda gikan sa city government.
Gitoohan nga ang naghinobrang aso nga mibuot sa palibot nga nasunog nga kabalayan ang nakapalumos sa biktima kay wala kini mga paso o samad sa kalawasan.
Sulti pa sa pamilya nga nakagawas na ang biktima apan kalit nga mibalik pagsulod sa balay hinungdang nalukong na ug wala na makagawas.
Siya miingon nga mag-agad sila sa resulta sa imbestigasyon sa BFP kon unsa ang rason sa hinungdan sa sunog.
Dili pa makompirmar sa punong brgy ang mga sulti-sulti nga depektosong linya sa koryente o nasunog nga egg-tray ang tinubdan sa kalayo kay trabaho kini sa BFP-CdeO.
Una nang gisaysay sa mga apektadong residente nga nagsugod ang sunog sa balay sa pamilyang Bolo apan may nagsulti usab nga naggikan kini sa kabanay nga Romulo.
Hisayrang siyam ang hingpit na-abo nga gabalayan ug duha ang damyos-partial diin dunay estimated structural damage nga 116-mil pesos.
