Dili posible nga mabakante o makulangan ang mga senador nga muboto sa pag-impeach kay Vice President Sara Duterte, kini segun sa balaod nga gilatid sa atong Konstitusyon sumala ni Atty. Teodoro A. Pastrana, ang kanhi pangulo sa Philippine Association of Law Schools.
Gipasabot sa abogado nga ang gidaghanon nga 16 ka boto gikan sa 24 ka mga senador usa ka fixed nga numero nga kinahanglang makab-ot alang sa pag-impeach, ug dili kini angay nga himuong sayon-sayon.
Aron masiguro nga kanunay kompleto ang gidaghanon sa mga magbabalaod bisan pa man sa mga wala damhang panghitabo sama sa kamatayon o uban pang matang sa incapacity, gipunting ni Atty. Pastrana nga ang Republic Act 6645 nagmando sa pagpahigayon og special elections pinaagi sa Comelec.
Tungod niini, iyang gipaniguro nga walay angay kabalak-an sa kapasidad sa senado sa pagpadayon sa maong proseso sanglit ang balaod mismo ang naghatag og solusyon aron mapun-an ang bisan unsang bakante nga posisyon sa maong lawak.
