CAGAYAN DE ORO CITY- Ipatuman sa liderato sa 4th ID,Philippine Army ang stand down order sa ilang tropa nga maoy migukod sa rebeldeng New People’s Army o NPA nga naghawid sa Prisoner of War nga si PO2 Anthony Natividad nga unang nadagit sa Brgy Dominorog,Talakag,Bukidnon sa miaging semana.
Gihimo ni IFI Bishop Felixberto Calang ang kumpirmasyon human personal niya nga na-estorya si 4th ID commander Maj Gen Benjamin Madrigal Jr nga mimando pagpuhag sa mga rebelde ilabina diha sa Bukidnon.
Si Calang miingon nga naporma na usab ni Bukidnon Gov Jose Maria Zubiri nga local crisis committee nga maoy motutok sa paspas nga pag-release kang Natividad.
Samtang mosunod ang tropa sa 58th IB,Philippine Army kon unsa man ang mando nga ilugwa ni Pres Rodrigo Duterte kabahin sa ilang kasamtangang gilusad nga all out war batok rebeldeng New People’s Army o NPA.
Kini ilabina nga namahayag si Pres Duterte nga ablihan niya’g balik ang sinultihay sa kalinaw tali sa CPP-NPA-NDF kon i-undang nila ang pagpangatake,pagpangdagit ug pagpangilkil sa mga kompanya sa kabukiran.
Si 58th IB spokesperson 1Lt Janelle Diaz miingon nga bisan sila ang nagtinguha nga makab-ot na sa gobierno ug komunistang grupo ang hingpit nga kahusay’g kalinaw dinhi sa nasud.
Hisayrang ang 58th IB ang ubos sa 4th ID,Philippine Army nga naglihok sa Misamis Oriental ug lalawigan sa Camiguin.
