CAGAYAN DE ORO CITY-Masaligon ang grupong STAREX-Piston Northern Mindanao nga hataga’g pabor sa kadagkuan sa DOTr partikular sa LTFRB-Manila ang ilang mga demanda kabahin sa pagpatuman sa PUV modernization program.
Kini human miduso sa ilang position paper ang grupo aron ipamugos nga dili phaseout apan rehabilitation program ang ipatuman sa gobierno sa mga karaang PUVs.
Gibutyag ni STAREX-Piston Sec Gen Ringo Lago nga kini ang nauyunan nila ni LTFRB regional director Allan Guro dihang nagkahinabi sila sa miaging adlaw.
Unaa niini,mihimo’g picket rally ang STAREX-Piston kuyog ang ubang pundok apan sila gipatawag ni Guro aron mahinabi personal kabahin sa PUV modernization program.
Samtang giutro na usab pagpasabot ni LTFRB regional director Allan Guro nga anaa pa sa transition period ang gobierno kabahin sa PUVs modernization program sa nasud.
Kini human naghinobra ang reaksyon sa pipila ka transport groups nga walay basehan kabahin sa pagwagtang sa mga karaang jeep de pasayruhan.
Miingon si Guro nga pursigido si Pres Rodrigo Duterte sa maong programa apan sa tuig 2021 pa ang hingpit nga pagpatuman niini.
Hisayran nga namugos si Lago nga angay ihunong sa ahensiya ang ‘Tanggal Bulok,Tanggal Usok’ operations kay bahad kini sa panginabuhian sa transport sektor sa rehiyon.
