Dili pa makabalik sa dula ang NBA superstar nga si Stephen Curry, bisan hapit na mahuman ang All-Star break.
Subay sa report, ang beteranong gwardiya mipaubos sa laing Magnetic Resonance Imaging (MRI) tungod sa gamay nga samad sa iyang tuo nga tuhod.
Ang resulta sa MRI nagpakita nga walay structural damage o grabeng injury sa tuhod sa 4-time NBA champion ug nagpabilin nga maayo ang kondisyon niini, bisan pa sa pipila ka adlaw nga kasakit.
Ipailawom usab siya sa laing re-evaluation sulod sa napulo ka adlaw sa dili pa siya mobalik sa hardcourt.
Kini ang rason nga sa dili pa ang All-Star Game sa tunga-tunga sa Pebrero, dili na makadula ang beteranong guwardiya.
Hisayran nga mag-engkwentro ang Golden State Warriors batok Boston Celtics, ning adlawa apan, gilauman na daan nga wala si Curry.
Sa pagkakaron, ang GSW nagkupot sa win-loss record nga 29-26, samtang aduna na lang kapin sa 25 ka dula sa dili pa hingpit nga mahuman ang regular match ups sa 2025-2026 NBA season.
