CAGAYAN DE ORO CITY-Ipatawag sa konseho ang mga lehitimong operator sa Small Town Lottery o STL nga apektado sa naghitak nga illegal nga pasugal ning syudad.
Kini human makit-i nga naglisod ang kapolisan pagsumpo sa illegal STL outlets bisan sa mando ni PNP regional director C/Supt Timoteo Pacleb nga ONE STRIKE policy batok sa mga pulpol nga station commanders.
Miingon si Kag George Goking,chairman sa committee on ways and means nga mangayo sila’g prangka nga tubag gikan sa PNP kon nganong dili masikop ang mga utok sa illegal STL outlets sa syudad.
Samtang gikalipay ug andam motambong ang legal STL operators sa lakang sa konseho nga sila ipatawag ning syudad sunod semana.
Miingon si Astrid Bana,presidente sa Misamis Oriental Cagayan de Oro Lotto Agents Incorporated o MOCLAI nga andam sila mohatag katin-awan sa gusto masayran nga konseho kabahin sa ilang operasyon sa syudad.
Hinoon,hangtod karon pabiling wala na kaayo makalihok ang illegal STL outlets tungod sa kusganong ONE STRIKE POLICY sa PNP-10 ilabina dinhi sa syudad.
