Giatubang karon sa Cagayan de Oro Seafoods Wholesalers Association ang hagit sa kapiot sa Bulua Fish Landing tungod sa paspas nga paglambo sa siyudad ug pagsaka sa demand sa mga seafoods.
Samtang giklaro sa ilang presidente nga si Irene Floro nga dili kini usa ka reklamo batok sa lokal nga gobyerno kundi usa ka structural gap human gitukod ang maong pasilidad sa tuig 2003 pa.
Gawas sa kahuot sa lugar, giisip usab nila nga pinakadakong hagit karon ang kakulang sa tubig nga nakaapektar sa ilang sanitation tungod sa hinay nga water pressure sa maong dapit.
Tungod niini, nanawagan karon si Floro ug tabang gikan sa city government aron madumala ang nagkadako nga panginahanglan sa pasilidad ug malikayan ang problema sa kahinlo.
