CAGAYAN DE ORO CITY – Dili suliran o problema apan suportado ni Cagayan de Oro 1st District Cong. Lordan Suan nga pa-imbestigaran ni Pres Bongbong Marcos ang mga proyekto sa gobierno nga ubos sa DPWH nga palpak sa paghatag proteksyon sa katawhan batok sa mga pagbaha.
Kini human unang nasampit ni Marcos sa iyang ikaupat nga State of Nation Address/SONA nga dismayado siya sa govt infrastracture flood control projects nga inotil sa pagpugong sa mga pagbaha aron proteksyonan ang katawhan epekto sa tulo ka bagyo ug hanging habagat nga miigo sa kauluhan sa milabay’ng semana.
Namahayag si Suan nga dili imposible nga adunay lapad nga kurapsyon sa mga proyekto nga gipangtukod nga wala mosubay sa gimando nga construction standards sa gobierno.
Una niini,namahayag ang DPWH 10 nga daw pulos pasado sa standards ang mga proyekto nga ubos sa ilang hurisdiksyon sa Northern Mindanao.
