CAGAYAN DE ORO CITY – Ipalig-on pa ni re-elected Cagayan de Oro 1st District Cong. Lordan Suan ang resolusyon sa iyang kapartido nga si Misamis Oriental 2nd District Rep. Bambi Emano nga nagtumong mo-imbestigar sa pagkapapha isip bise-presidente ni Gusa Punong Brgy Marlo Tabac sa Liga ng mga Kapitanes sa Pilipinas – Cagayan de Oro Chapter ning syudad.
Kini ang pahayag ni Suan igo paghuman niya nga nakahurar sa iyang ikaduhang termino isip kongresista sa distrito uno diin personal gisaksihan ni Emano nga pulos sakop sa Padayon Pilipino party sa Brgy Besigan sa dakbayan.
Matud ni Suan sa mga pangutana sa media nga sama sa gitoohan ni Tabac, kumbinsido usab kini nga kuwestiyonable ug dili makaratarunganon ang gihimo sa liga rason nga angayan lang duki-dukion sa kamarabaha sa pagbalik sa ilang sesyon sa kauluhan.
Una na nang namahayag si Emano nga idangop usab niya sa buhatan ni Senator Koko Pimentel aron matabangan si Tabac nga pugsanong gisipa sa katungdanan subay sa resolusyon nga nagkanayon nga nawad-an sa pagsalig ug kumpiyansa ang daghang mga kapitanes nga sakop sa liga.
Dumduman nga namugos si ABC President Kag. Alam Lim nga gi-presyur niya ipabakante ang puwesto ni Tabac kay maoy gusto sa kadaghanang kapitanes kay nawad-an na daw sila sa pagsalig.
Hisayrang nanganti si Tabac nga dili kini mohawa sa katungdanan ug hatagan sa ensaktong partida ang grupo ni Lim sa petsa sa 30 sa Hunyo ning tuiga.
