CAGAYAN DE ORO CITY-Giyam-iran lang ni City Coun Lordan Suan ang hagit ni City Vice Mayor Rainer Joaquin ‘Kikang’ Uy nga ipaluwat kini sa iyang pwesto.
Kini kon dili niya mapamatud-an nga kabahin ang pamilya ni Uy nga nagsilbi niini nga job orders sa konseho.
Si Suan miingon nga dili siya mo-resign kay wala siya’y malambigit sa nepotismo. Maoy gihagit niini nga mo-resign ang mga appointing authority nga guilty sa maong salaod.
Una nang gihagit ni Uy si Suan nga moluwat isip opisyal sa syudad.
Gihagit ni Suan si Uy nga ipaggawas ug ipakita sa publiko ang listahan sa tanang job orders sa syudad.
Matud ni Suan nga mao lamang kini ang bugtong paagi nga mahilom ang isyu aron makita sa publiko kon kinsa ang mga opisyal sa syudad nga nalambigit sa nepotismo.
Una nang gitin-aw ni Suan nga andam siyang makig-areglo sa panagbangi nila ni Uy.
