CAGAYAN DE ORO CITY – Andam ang magsoong Emano nga dawaton ug paluyuhan kon unsa man ang makab-ot nga hukom ni Cagayan de Oro 1st District Cong. Lordan Suan kabahin sa ilang mga lakang sa 2025 elections sa dakbayan.
Kini ang tubag ni Misamis Oriental 2nd District Cong. Bambi Emano sa pangutana sa Bombo Radyo kon nagkatagbo na ba sila ni Suan pipila ka adlaw gikan sa anunsyo nga nag-alyansa na’g puwersa si Cagayan de Oro City Mayor Rolando ‘Klarex’ Uy ug District 2 Rep. Rufus Rodriguez sa Centrist Democratic Party sa sunod piliay.
Gikompirmar ni Emano nga nagkatagbo ug nagkahisgot sila ni Suan kabahin niini.
Siya miingon nga gihatagan nila sa katungod si Suan nga maplastar kon kinsa ang gustong ipadagan pagka-mayor,bise-mayor ug kongresista sa distrito dos ingon man mga kagawad.
Apan giklaro niini nga angayang moagi una sa konsultasyon sa Partido Padayon Pilipino ang pinal nga hukom sa mapormang line-up ayha ilugwa sa publiko.
Hinoon,wala gihisgot sa kongresista kon preparasyon kini nga pangrontra batok Uy-Rodriguez alliance apan masabot nga andam na ang partido motanyag sa ilang serbisyo dinhi sa syudad.
Una nang misulti si Emano kinsa anak-lalaki ni late Padayon Pilipino Party founder former City Mayor Vicente ‘Dongkoy’ Emano nga kon unsa man ang maporma linya ni Suan apil sa mohatag suporta niini si Tagoloan Mayor Atty Nadya Emano-Elipe ug City Councilor 2nd District Councilor Yvy Emano.
Dumduman nga bukas si Suan nga kuhaon isip kandidato pagka-mayor ang tali ni kanhi City Mayor Oscar Moreno;former mayoralty candidate Pompee La Viña ug Phividec administrator Atty Joseph Bernedo aron i-atbang kang Klarex.
Sa panig ni Pompee, pursigido kining modagan balik pagka-mayor ingon man si Moreno ilabina kon makuha ang suporta sa partido Padayon Pilipino.
Samtang si Bernedo ang nahugon-hugon usab gipangulitawhan nga ipadagan apan mag-agad usab kini sa pagtugot ni Pres Bongbong Marcos.
