CAGAYAN DE ORO CITY – Gingil-aran pag-ayo si opposition City Councilor Atty Lordan Suan nga gitugtan sa liderato sa konseho nga magamit kini aron mangatake ang pipila sa iyang mga kauban batok kaniya.
Kini human unang nag-special report si SK Federation President John Michael Seno diin nag-akusar nga nakahimo’g kasupakan ang mga billboard structure nga iya sa pamilyang Suan ning syudad.
Miingon si Suan nga kasupakan sa parliamentary procedures ug nagpaubos sa kalidad konseho ang pag-atake ni Seno batok kaniya tungod sa maong isyu.
Samtang walay dautan sa pagsulti atubangan sa konseho kon unsa man ang nakit-ang mga pagsupak sa billboard structures nga gipanag-iya sa pamilyang Suan ning dakbayan.
Kini ang depensa ni Seno sa dihang gipabati ni Suan ang iyang pagka-dismaya kon nganong napasagdan sa konseho ang gihimo niini sa ilang sesyon kagahapon sa hapon.
Namugos si Seno nga gi-basi niya sa mga ebedensiya ug balaod ang unod sa iyang special report ug walay laing motibo niini.
Samtang gisugyot ni majority member City Councilor Roger Abaday nga gilayon nang ipatuman ang silot kon tinud-anay nga dunay nasupak ang billboard construction nga gipanag-iya sa pamilyang Suan sa dakbayan.
Gisubay ni Abaday ang iyang pahayag sa gi-presentar nga special report ni Seno sa ilang sesyon kagahapong adlawa.
Miingon ang konsehal nga angayang molihok na niini ang Office of the Building Official ug city engineer’s office kabahin sa maong isyu.
Samtang gi-sermonan sa laing majority member nga si City Councilor Zaldy Ocon ang iyang mga kauban nga mi-diritso’g hukom nga nakahimo’g ilegal nga pagtukod sa billboards ang pamilya ni Suan sa dakbayan.
Miingon si Ocon nga angayang magbaton sa ensaktong gabayan si Seno sa iyang gihimo nga special report kay aron dili mogawas nga mga bastos sila atubangan sa katawhan.
Giwitkan usab ni Ocon si Abaday nga nagsugyot nga gilayong pasilutan ang kompanyang Ultra Craft advertising bisan kon wala pa’y imbestigasyon kabahin sa pasangil ni Seno.
