CAGAYAN DE ORO CITY – Gisulayan sa legal team ni Carmen Punong Brgy Kikang Uy nga dili maproklamar isip mananaug pagka-kongresista si re-electionist Cong. Lordan Suan sa distrito sa syudad.
Kini human midaso sa petisyon ang legal team ni Kikang aron ipa-diskuwalipikar ang pagka-kongresista ni Suan ug ma-hold ang proklamasyon sa kadaugan niini sa city board of canvassers nga gihimo sa city council kaganihang buntag.
Miingon ang mga abogado ni Kikang nga basehan nila sa maong lakang ang giingong grabeng pagpamalit ni Suan sa mga boto ngadto sa katawhan sa distrito.
Apan sulti ni city board of canvassers chairman City Election Officer Atty. Ramil Acol nga dili angayang mapugnga ang deklarasyon sa kadaugan ni Suan.
Kini tungod kay dili haom nga benyu sa maong reklamo ang CBC apan gitala lang sa Comelec ang maong manipestasyon sa legal team ni Uy.
